სააგენტო ITA-ს მომწოდებელთა რეესტრში რეგისტრაცია

12 მარტი, 2019

დღეიდან მიმდინარეობს საქართველოში იტალიის საელჩოსთან არსებული იტალიის საგარეო ვაჭრობის წარმომადგენლობის-სააგენტო ITA-ს  ’’მომწოდებელთა რეესტრში” რეგისტრაცია, რომელიც ა.წ. 31 მარტს დასრულდება.

კომპანიებს, რომლებიც დაინტერესებულები იქნებიან სხვადასხვა ინიციატივაზე შეთავაზება გაუკეთონ სააგენტოს, შეუძლიათ,  მომსახურების სფეროები და სარეგისტრაციო დოკუმენტები იხილონ შემდეგ ლინქზე: www.ice.it/en/markets/georgia (სექცია: work with us).
დეტალებისა და/ან დაზუსტებებისთვის მოგვწერეთ:  tbilisi@ice.it.

სემინარების ციკლი “ახალი ტექნოლოგიები და კულტურული მემკვიდრეობა: იტალიური გამოცდილება”

22 თებერვალი, 2019

თბილისში იტალიის საელჩოს მიერ ჩაფიქრებული სემინარების ციკლის  ( 2018 სექტემბერი-2019 თებერვალი)  მიზანი იყო მუზეუმების დაპროექტებასთან, მოწყობასა და მართვასთან დაკავშირებული საკითხების კვლევა და ტექნოლოგიებისა და კულტურული მემკვიდრეობის დაცვა-პოპულარიზაციის ურთიერთკავშირის შესწავლა.

იტალიის ელჩის ელჩის ანტონიო ენრიკო ბარტოლის აქტიური მხარდაჭერით ორგანიზებული სემინარები იმარტებოდა იტალიის კვლევების ეროვნულ საბჭოსთან და ქართულ ინსტიტუციებთან (საქართველოს განათლების, მეცნიერების, კულტურისა და სპორტის სამინისტროსთანივანე ჯავახიშვილის სახელობის თბილისის სახელმწიფო უნივერსიტეტსა და საქართველოს ეროვნულ მუზეუმთან) თანამშრომლობით და ემსახურებოდა ქართული მხარისთვის იტალიის სამეცნიერო მიღწევებისა და სამუზეუმო სფეროში მომუშავე მოწინავე კომპანიების გამოცდილების გაზიარებასა და დაინტერესებულ ინსტიტუციებთან თანამშრომლობის ხელშეწყობას. ციკლის ფარგლებში გაიმართა შემდეგი სემინარები:

  1. “იმერსიული გამოფენები და თხრობის ხელოვნება: საზოგადოების ჩართვა და წარსულისთვის ახალი სიცოცხლის მინიჭება“,
  2. 21-ე საუკუნის მუზეუმების დაპროექტება და მართვა“,
  3. როგორ შეიძლება ძველი ქალაქი ჭკვიან ქალაქად იქცეს?”.

იტალიაში ვირუსებისგან გაწმენდილი ქართული ვაზის ჯიშები

31 იანვარი, 2019

2019 წლის 30 იანვარს ვაზის სანერგე მეურნეობის მსოფლიო ლიდერმა  „ვივაი კოოპერატივი რაუშედოს“ წარმომადგენელმა ბ-ნ სტეფანო ბატისტელამ  ქართველი მევენახეებისა და მეღვინეებისთვის პრეზენტაცია გამართა. იტალიური „ვივაი კოოპერატივი რაუშედო“ თავის ქართველ პარტნიორთან, კომპანია „გრინ სოლუშენთან“ ერთად ქართულ ბაზარს ვისუსისგან გაწმენდილ ქართული ვაზის  ათამდე ჯიშის ნერგს თავაზობს ( საფერავი, რქაწითელი, ოჯალეში, კახური მწვანე და სხვა), რომლის გახარების ალბათობა 100%-ს უახლოვდება.

“Made in Italy” საქველმოქმედო საახალწლო გამოფენა-გაყიდვაზე

29 ნოემბერი, 2018

ქალთა საერთაშორისო ასოციაცია საქართველოს (IWAG) ორგანიზებით საქველმოქმედო საახალწლო-საშობაო გამოფენა-გაყიდვა წელს 1 დეკემბერს სასტუმრო “რადისონ ბლუ ივერიაში” გაიმართება (10.00-18.00). უკვე ტრადიციული ღონისძიების მიზანია გამოფენა-გაყიდვის შედეგად შემოსული თანხა მოახმაროს მზრუნველობამოკლებულ ბავშვებს, ასევე ქალებსა და მოხუცებს. ღონისძიებაში სხვადასხვა დარგის კომპანიებთან და ორგანიზაციებთან ერთად  ჩართულია ოცდაათამდე საელჩო და საერთაშორისო მისია.

იტალიურ კუთხეებში  შეგიძლიათ შეიძინოთ სხვადასხვა “Made in Italy” – იტალიური საახალწლო თუ საშობაო საჩუქრები;  ასევე  დააგემოვნოთ გამორჩეული იტალიური გემო.

 

 

 

“მამმა მია” იტალიური რესტორანი თბილისში

25 ნოემბერი, 2018

“მამმა მია” ასე ქვია იტალიურ რესტორანს, რომელიც იტალიური სამზარეულოს კვირეულის ბოლო დღეს-25 ნოემბერს გაიხსნა. რესტორანი თბილისის ცენტრში, ზემელის #24-ში მდებარეობს და გამორჩეულად გემრიელი იტალიური კერძების გარდა, იტალიურ გარემოს გთავაზობთ. ესაა  იტალიური “ტრატორიის” ტიპის რესტორანი, მყუდრო გარემოთი და  იტალიური გრაფიკით  –  სადილის შეკვეთა      12.00 სთ.-დან 16.00 სთ.- მდე შეგეძლებათ, ხოლო  ვახშამის – 19.00სთ.-დან-24.00სთ.მდე.

აქ თავს  მართლაც იტალიის  “ტრატორიაში” იგრძნობთ.

იტალიური სამზარეულოს მსოფლიო კვირეული საქართველოში – გალა საღამო

24 ნოემბერი, 2018

იტალიური სამზარეულოს მსოფლიო კვირეულთან დაკავშირებით  22 ნოემბერს იტალიის საელჩოს ორგანიზებით ნამდვილი იტალიური გემოს დასაგემოვნებლად “რესპუბლიკაში” იტალიური საღამო გაიმართა.  სტუმრებმა საქართველოში  გალა საღამოსთვის საგანგებოდ მოწვეული  შეფ-მზარეულების მარკო კოლეონის და  უმბერტო კავინას მიერ მომზადებული გამორჩეული იტალიური გემო დააგემოვნეს: დამარილებული ორაგული ხიზილალით, რიზოტო მილანურად, პასტა ფუზილონე კრევეტების სოუსით და ნახევრად კარამელიზირებული ჩერი პომიდვრით, ძროხის სუკი ბალზამიკოთი,  ბოსტნეულის რატატუი და ბოლოს- პან დი პარმას ტირამისუ. ვახშამს ცნობილი იტალიური კომპანიის Frescobaldi-ის ღვინო კიდევ უფრო განსაკუთრებულს ხდიდა.

საღამო მხოლოდ კულინარიული დატვირთვის არ ყოფილა-იგი მრავალფეროვნებით გამოირჩეოდა, რადგან აქ “გამორჩეული იტალიური გემოს” გარდა, სტუმრებს საშუალება ჰქონდათ სხვა “იტალიურიც”  ენახათ: იტალიური მოდის კონფედერაციის CNA Federmoda-ს ორგანიზებით “Rossorame” დიზაინერების-ბრუნო სიმეონესა და დანიელე დელ ჯენიოს მოდის ბოლო ტრენდები, ხელით შექმნილი, ინდივიდუალურ ზომებზე მორგებული ფეხსაცმლის დიდი ოსტატის-ვლადი რიგატოს გამორჩეული ხარისხის  მამაკაცის ფეხსაცმელები და სუნამოების შექმნის დიდი ოსტატის – სილენო კელონის  ესენციების საიდუმლოებები.

 

“იტალიის 5 გრძნობა” სოლო ლაუნჯში ჭავჭავაძე

22 ნოემბერი, 2018

იტალიის საელჩოს, იტალიის სავაჭრო წარმომადგენლობის (ITA)   და სოლოს  ორგანიზებით 21 ნოემბერს სოლო ლაუნჯმა ჭავჭავაძე   საღამოს  ”იტალიის ხუთ გრძნობა” უმასპინძლა.  ეს იყო მოგზაურობა იტალიის ”ხუთ გრძნობაში”, სადაც სტუმრებმა ნახეს თუ როგორ ქმნიან იტალიაში ხელით და კიდევ ერთხელ შეიგრძნეს ნამდვილი იტალიური გემო.

სოლო ლაუნჯის სასიამოვნო გარემოში ერთმანეთს შეერწყა რამდენიმე ”იტალიური”:  სურნელი, გემო, არომატი, ფორმები და ფერები:

  • ფეხსაცმლის დიდი ოსტატის, ვლადი რიგატოს ინდივიდულურად მორგებული ფეხსაცმლის ხელით შექმნის ხელოვნება;
  • მეორე დიდი ოსტატის, სუნამოების შემქმნელის – სილენო კელონის ესენციების საიდუმლო;
  • RossoRame-” დიზაინერების  ბრუნო სიმეონესა და დანიელე დელ ჯენიოს მოდის ბოლო ტრენდები;
  • ნამდვილი ხიზილალის, იტალიური ”Calvisano-ს”-„შავი ოქროს“ დაუვიწყარი გემო და
  • ”Frescobaldi-ს”, ერთ-ერთი უძველესი იტალიური ღვინის  გამორჩეული გემო.

განახლებული “პომოდორისიმო” გაიხსნა

20 ნოემბერი, 2018

იტალიური სამზარეულოს მესამე მსოფლიო კვირეულის პირველ დღეს-19 ნოემბერს  ”პომოდორისიმოს” განახლებული რესტორანი ჭავჭავაძის №33ა-ში ოფიციალურად გაიხსნა.  პიცერია და სტეიკის სახლი ”პომოდორისიმო” 2012 წლიდან მომხმარებლებს  იტალიურ სამზარეულოს სთავაზობდა  ნეაპოლიტანურ გარემოში. 2018 წლიდან კი ”პომოდორისიმოს” ბრენდი განახლებული კონცეფციით ფუნქციონირებს:  სავაჭრო  ცენტრის- ”მერანის” ლოკაციაზე წარმოდგენილია კვლავ პიცერია და სტეიკის სახლი, ხოლო ჭავჭავაძის გამზირზე N33-ის ლოკაციაზე მაღალი კლასის იტალიური რესტორანი უკვე განახლებული ფორმატით გელოდებათ.

იტალიური სამზარეულოს მსოფლიო კვირეული III – 2018

18 ნოემბერი, 2018

იტალიური სამზარეულოს მსოფლიო კვირეული წელს  მესამედ იმართება და მოიცავს 19-25 ნოემბრის პერიოდს. კვირეულის  მიზანია, ხელი შეუწყოს იტალიური სამზარეულოსა და აგრო-სასურსათო პროდუქციის უცხოეთში პოპულარიზაციას და უკეთ წარმოაჩინოს “Made in Italy-ს”, როგორც  სავაჭრო ნიშნის და იტალიური კერძებისა და კვების პროდუქტების განმასხვავებელი მახასიათებლები:  გემო, ხარისხი, იდენტობა,  ბიომრავალფეროვნება და სხვა.

თბილისში კვირეულთან დაკავშირებით მთელ რიგ ღონისძიებებთან   ერთად მიმდინარეობს კამპანია: “იტალიური გემო გამორჩეულია”, რომელიც “იტალიური გემოს” უკეთ წარმოჩინებას გულისხმობს. რესტორნების და სხვა კვების ობიექტების, სუპერმარკეტების და სასურსათო მაღაზიების ჩართულობით და მათი მხრიდან წამახალისებელი აქციების შეთავაზებით,  მომხმარებლებს  შესაძლებლობა აქვთ  კიდევ ერთხელ დააგემოვნონ და უკეთ გაეცნონ იტალიურ გემოს.

“დოლჩი დი პარადისო” – თბილისში იტალიური სანაყინე, საკონდიტრო და კაფეტერია გაიხსნა

1 ივლისი, 2018

30 ივნისს ჭავჭავაძის გამზირზე #40-ში იტალიური სანაყინე , საკონდიტრო  და კაფეტერია “დოლჩი დი პარადისო“ გაიხსნა.

ქართულ ბაზარზე იტალიური სანაყინე და საკონდიტრო Visibilio Gelato შემოვიდა, რომელიც 2015 წელს დაფუძნებული ახალგაზრდა იტალიური კომპანიაა, ათწლიანი გამოცდილებით და  არაფაბრიკული ნაყინის წარმოებით: ნაყინი მზადდება ტრადიციული საამქროს გარეშე; მისი წარმოება ხდება კლიენტის თვალწინ.

სანაყინის, საკონდიტროსა და კაფეტერიას “დოლჩი დი პარადისოს” გახსნაზე მისულმა მრავალრიცხოვანმა სტუმარმა   სხვადასხვა გემოს  მრავალფეროვანი უგემრიელესი იტალიური ნაყინი და ტკბილეული დააგემოვნა. შეთავაზებული იტალიური ლიმონჩელო კი კიდევ ერთხელ აგრძნობინებდა სტუმრებს  იტალიურ გარემოს და იტალიური გემოს გამორჩეულობას.